Rodés
Aqueste article es redigit en lengadocian.
Rodés es una vila de Roergue, cap-luòc del departament de l'Avairon, dins la region Occitània-Pirinèus-Mediterranèa, en França (Union Europèa). Anciana capitala del Roergue, sos estatjants son los Rodaneses.
I a 24 319 estatjants a Rodés segon lo recensament de 2018.
Istòria[modificar | modificar la font]
Las traças mai ancianas de la vila se situan a l'entorn del sègle V abans Crist, quand un pòble cèlta vengut d'Euròpa centrala, los Rutèns, s'i installèron. I fondèron un dels oppidums mai caracteristics de la civilizacion galesa, l'oppidum de Segodunum.
Jos l'Empèri roman, la vila prenguèt lo nom de Civitas Rutenorum o ad Rutenos. A la fin de l'Empèri roman e a la debuta de l'Edat Mejana, la vila es compausada de doas comunautats rivalas, la Ciutat, jos l'autoritat de l'evèsque e a l'entorn de la catedrala Nòstra-Dòna, e lo Borg, jos l'autoritat del comte, a l'entorn de la glèisa Sant Amans. Rodés es alara, e fins a la revolucion, la capitala del Roergue.
A partir de la revolucion, Rodés ven lo cap-luòc del departament de l'Avairon, que correspond mai o mens a l'ancien territòri del Roergue.
Rodés foguèt longtemps, fins a la mitat del sègle XX al mens, formada de tres ensembles : la Ciutat, lo Borg e lo Barri Sant-Cirici. Mas tre la debuta del sègle XX, de novèls barris se desvolopèron als extrems de la vila (barris Cardalhac, Pichon-Lengadòc, Gorgan, e enfin Borranh).
Monuments[modificar | modificar la font]
Los monuments màgers de la vila son la catedrala Nòstra-Dòna de Rodés construsida entre lo sègle XIII e lo sègle XIV, la glèisa Sant-Amans construsida al sègle XII, la Tor Màger, actuala ostalariá Cheval Noir, l'ostal d'Armanhac (plaça de l'Olmet) e l'ostal de l'Anonciacion, e tanben lo musèu Soulages dedicat a l'òbra del pintre rodanés contemporanèu Pierre Soulages.